Ki wòl yon travayè sosyal nan peyi Dayiti ?

Apre plis pase 40 lane depi disiplin Travay Sosyal la ap anseye nan Inivèsite Leta Ayisyen an, gen anpil moun ki pa konn sa l ye ni wòl pwofesyonèl nan domèn sa nan peyi a

Travay Sosyal se yon disiplin syantifik k ap founi je gade, reflechi sou pwoblèm sosyal yo gras ak teyori konpòtman, sosyolojik, elt., epi pwopoze kèk pis solisyon nan kad prevansyon ak entèvansyon pou transfòmasyon sosyete a.

Nan peyi nou, yo rele yo travayè/z sosyal. Men nan kèk lòt peyi, tit yo varye. Konsa, nou ka tande yo rele yo asistan sosyal, edikatè/tris espesyalize, animatè/tris sosyal, elatriye.

Travayè/z sosyal yo ka travay nan divès kalte domèn.

Entèvansyon yo chita sou transfòmasyon sosyal, chanjman sosyal, jistis sosyal, respè diyite ak dwa moun, liberasyon moun, elt. Yo entèvni sou pwoblèm sosyal yo an jeneral tankou pwoblèm grangou, lamizè, rapò miwo miba nan mitan moun yo nan sosyete a, konfli, enjistis, vyolans ki chita sou sèks moun.

Travayè/z sosyal yo fè entèvansyon tou sou tout kalte nouvo pwoblèm sosyal tankou Sida, toksikomani, vyolans nan lekòl, kolera, elt. ;

Pwofesyonèl sa yo travay nan katye popilè yo ak lè gen katastwòf natirèl tankou tranblemanntè, siklòn. Yo ede pwoteje gwoup vilnerab ki gen bezwen èd espesyal tankou moun andikape, timoun ki nan lari, timoun ki rete lakay moun (rèstavèk) fanm k ap sibi vyolans.

Travayè/z sosyal yo gen devwa tou pou defann dwa tout moun nan sosyete a ; akonpanye ak konseye sila yo ki nan nesesite, espesyalman sila yo ki nan detrès ; enfòme ak konseye gouvènman peyi a. Yo kapab tou lite kont tout fòm diskriminasyon ak inegalite sosyal ; chèche ak analize pratik ki miyò pou fonksyònman sosyete a ; fè fòmasyon pou pèmèt moun k ap viv nan sosyete a devlope kapasite yo epi vin mèt tèt yo.

Dapre fòmasyon yo resevwa, yo ka travay prèske tout kote ki gen moun.

Lopital pami kèk nan note travayè/z sosyal ka travay. Yo ka travay dirèkteman ak pasyan an pou akonpaye l, rekonfòte l suivan maladi l genyen an (Maladi kè, Sida, elt.) Yo kapab rann pasyan an vizit pou verifye si l pran tout medikaman li yo, epi fè yon rapò. Yo kapab tou fè fòmasyon, jere kalite sèvis lopital la ofri…

Nou kapab jwenn Travayè/z sosyal yo nan nivo Leta (Ministè afè sosyal ak travay, Byennèt sosyal, Kès asistans sosal OFATMA, ONA, elt.).

Sant sikyatri se enstisyon kote yo ka travay tou. Yo la pou akonpanye sila ki gen pwoblèm/twoub mantal.

Travayè/z sosyal gen plas yo tou nan lekòl. Yo ka akonpanye elèv yo, kontwole fason kou yo dispanse, òganize aktivite k ap devlope aptitid elèv yo, epi veye sou estrikti ak jesyon batiman yo.

Sant devlopman ak òfelina se kote nou jwenn anpil pwofesyonèl sa yo. Yo kapab jwe menm wòl yo jwe nan lekòl yo.

Yon dènye kote nou jwenn travayè/z sosyal, se nan òganizasyon lokal ki kapab sant devlopman, òganizasyon defans dwa moun, platfòm, asosyasyon fanm, asosyasyon jenès epi òganizasyon entènasyonal ak ONG.

Ladan yo, travayè ak travayèz sosyal yo kapab chèf ekip, ajan devlopman, responsab pwogram, ofisye devlopman timoun ak jèn, direktè, konsiltan, fasilitatè/fasilitatris…

Natacha Gué se yon travayèz sosyal. Li gen yon karyè ki vrèman long. Premye kote li travay se nan fondasyon Maurice Sixto kote li travay ak timoun ki rete ak moun. Li te konn òganize aktivite pou timoun yo, detann yo epi chache rankontre moun kote yo ap viv pou sansibilize yo sou sitiyasyon timoun yo epi fè fòmasyon pou yo.

Apresa, Gué te asistant sosyal nan GHESKIO. Li te akonpaye sila ki sewopozitif yo epi fasilite yo jwenn kredi.

Gué te travay nan nivo Leta, nan Enstiti byennèt sosyal ak rechèch (IBESR). Nan enstitisyon sa, li te responsab fanmi vilnerab yo. Se li menm ki te elabore zouti adopsyon y ap itilize jouk jounen jodi a. Li te travay anpil lòt kote tankou Save the Children ; nan yon lopital kote li te jere kesyon asirans sante.

Pou konnya, Gué ap travay nan yon òganizasyon katolik. Li se responsab yon pwojè ki la pou akonpanye òfelina yo pou rive fè timoun yo jwenn paran yo epi fè fòmasyon pou yo ka pran desten yo nan de pla men yo. Toujou nan kad pwojè sa a, paran yo suiv fòmasyon epi yo benefisye yon pwogram kredi pou yo fè ti aktivite yo.

Nou rankontre yon lòt travayèz sosyal ki se Dieula Nicolas. L ap travay nan yon òganizasyon nan domèn pwoteksyon timoun. Nicolas ede timoun yo rive jwenn fanmi yo epi li verifye pyès timoun yo pou l ka fè suivi legal yo. Li la tou pou l fè plan suivi pou fanmi yo, lè l rive jwenn yo. Li se responsab pwojè nan yon lòt enstitisyon, li ekri pwojè epi li kowòdone yo tou. Anvan sa, li te akonpanyatris nan yon òganizasyon ki travay ak jèn ki nan katye defavorize ki nan Carrefour-feuilles.

Nou diskite tou ak travayè sosyal Marco Lucien. Li te travay nan Fondasyon Dwa Pou Tout Moun. Lucien te responsab komite k ap jere aktivite ki gen pou wè ak ledikasyon.

Lucien te travay Handicap International apre siklòn Matthew a. Entèvansyon l yo te chita sou plan sikolojik ak sosyal. Li te patisipe tou nan distribisyon materyèl pou sila ki te viktim yo dapre sa sitiyasyon yo a te egzije. Jodiya, li se ajan sansibilizasyon nan Solidarités Internationales. Li travay plis nan katye defavorize yo pou ede moun yo viv miyò. Li fè fòmasyon pou yo tou sou prensip lijyèn yo pou anpeche yo trape maladi.

Dieula Nicolas ak Marco Lucien se de non nou chwazi.

Rose Eveyoung JEAN MARC, etidyant nan Travay Sosyal