Semèn ki sot pase a, te gen gwo lòbèy nan peyi a. Anpil moun ki te gen pwoblèm sou jan chèf isit ap mennen peyi a pwofite foure kò yo nan manifestasyon pou mande mouche leta leve pye sou kou yo, pou yo di sètase, sitou ak koze bidjè souse zo sa. Manifestasyon, boule kawoutyou, kraze vit biznis, kraze vit machin, boule machin, elatriye. Nou menm nan espò poukisa poun ta tou pwofite al manifeste ? Nou menm isit ki nan basket, poukisa pou n ta al manifeste ?
Nan tout rakwen ou pase, depi kote a glasiye, gen espas pou 5 moun kanpe ou jwenn yon poto ak yon sèk kwoke ladann moun ap jwe basket. Se 1&1, 3×3, siw betize yo fè 5-5 sou li. Sou plas piblik yo menm se pa pale ! Jèn gason fè kenken, maten kou lanwit, match konn ap jwe epi gen nenpòt 20 ekip dèyè, wa konn se lè moun ap pran liy anba solèy cho pou w al labank oswa pou al chache viza anbasad. Mesye dam yo motive ! Yo renmen jwèt la ! Pandan vakans lan, chanpyona blayi nan tout katye, se moman an pou pouw montre zanmi, fanmi, ti mennaj nan ki pwen ou fò. Basketè fin awoyo ! Men anpil fwa, tennis ki nan pye yo a konn pa menm bon, boul yap jwe a kon tankou blad, moun ki abit la pafwa pa menm konn règ jwèt la. Zafè siman ka bay pwoblèm nan jenou an, sa se blag. Nèg ap vole, ponpe, kouri sou li si w konn se tankou sou bèl nat oswa matla yap tonbe.
Pandan vakans lan se pa de kan basket ki pat genyen nan peyi isit. Power Foward yon bò, NPSE yon lòt bò, fè plizyè jou ap travay ak pil timoun pou aprann yo kèk prensip ak metòd antrenman pou yo ka vin pi fò nan jwèt la. Federasyon an bò kote pa l te pwofite nan youn nan kan sa yo pou l te chwazi 7 tijèn pou al nan yon kan ki te dwe fèt Dallas nan mwa dawout ki sot pase la, nan lide pou reprezante peyi a nan seleksyon ki gen pou fèt – si lap fèt. Men malchans pou yo – ti jèn yo – lajan pa tonbe, pwojè kanpe, pèsonn pa fè wonn pòt. Ala bèl bagay se lè radyo, televizyon ak jounal ap mache di w pral pati ak gwo gòj, fanmi w ak zanmi w gen tan ap felisite w paske w pra l reyalize rèv ou, epi w pa fè yon pa kita yon pa nago. Yo pran nan rèz ! Tijèn yo oblije lage kò yo nan swadizan chanpyona dezyèm ak twazyèm divizyon, kote yo kreye yon bann ekip brit sou kou, san antrenman, san preparasyon, deja pa menm gen chanpyona premye divizyon ! O… mwen tap bliye, gen chanpyona premye divizyon wi : ASHBAC – se la w jwenn tout nèg fò yo kote enstitisyon mèt tèt yo ansanm pou yo lage lage kò yo nan « Dyesèlmevwa », sou fòm basket. Na final la menm se wololoy, paske se menm manm federasyon basket yo ankò kap vin remèt, koup ak meday. Epi tou pito nou lèd nou la !
Nan tout peyi a nou gen 2 jimnazyòm kap fonksyone. Sa pa pwoblèm. Epi sa pou n fè jimnazyòm tou ? Valè kote ki genyen pou moun jwe basket. Si w vle jwe basket ou wè lari a pa bon pou ou, pran fè sèso w, mare l nan baryè lakay ou a epi chèche ti boul mate w jwe basket. Sa pa gade leta ! An palan de jimnazyòm kite m di nou, mwa pase anwo mal nan yon final basket inivèsite nan jimnazyòm pòtoprens lan – sak fèt depi 79 la, m pot ko menm fèt. Bel anbyans, rara melanje ak DJ ap fè bri, okenn jwè pa fouti pale ak patnè l la sou teren an, jwè yo pa fouti konsantre yo lè yap choute yon lansefran paske se nan moman an Dj a gen pi gwo bri a pou l fè, menm abit yo preske ap ranni si pou yo pale ansanm telman gen eskonbrit. M pa bezwen di nou bèl anbyans ! Men se pa sa k pi bèl la non, pandan match ap jwe, piblik la ap chofe, ekip yo kole sere, epi gen yon lapli ki di men mwen. O O… se gade m gade m wè jwè ap kilbite, nèg ap pran so, sa kap glise, sa kap plonje. Mwen pa bezwen di nou, premye fwa map gade yon baskèt akwatik, bel spektak ! Epi, plizyè moun kanpe bò teren an, ap tann chak lè ge yon ti tan, ak mòp nan men yo, pou yo vin retire dlo sou teren an. Jimnazyòm nou an – sa yo repare an 2015 lan la a , ki poko menm gen 2 zan an – li ka twonpe solèy, men l pa ka twonpe lapli.
Sot gen 2 jwè NBA, ki te antre nan peyi a sa pa gen lontan. Skal, pitit peyi a, ki te la avèk nou anba dekonm, ki vini poul pataje eksperyans li ak plizyè tijèn gason epi ba yo kèk kado, pran na yon meli melo nan ladwan tou swit aprè li fin vizite chèf peyi a. Pou jouk li kite peyi a, li pat ka debloke anpil nan sal te pote timoun yo. Kout fil, kòlè, nad marinad ! Ala bèl bagay sa !?!? Chef leta isit pa gen poul ede pitit peyi a nan anyen, se tann yo fin sipèsta, tann yo fin rive, fè foto ak yo, fè pwomès, epi anyen ankò. Dayè kiyès ki ap mande yo rapò ? Nerlens Noël te pase tou, pitit pitit peyi a, li di l klè volonte l se ede peyi a paske se la manman l soti, li prè pou l vin jwe pou seleksyon nasyonal Aloral la. Men sa li menm li plis pa regade leta toujou. Ki koze seleksyon nasyonal basket sa ? Ebyen palmantè yo pap jwenn 7 milya goud yo a ankò? Dayè lè ministè jenès ak espò bay federasyon basket la 800 000 goud nan yon milya goud ki nan men l pou ane a, sa ki bay gwo 0.1%. Sa montre w ki tout enpòtans leta bay jwèt la nan peyi a !
Se sa k fè mw menm, mw pa pra l manifeste pou koze bidjè, ni pou koze espò, alevwa pou koze Basket !
Twitter: @pjprudent
Comments